Izingxenye zesikole eMpolweni zishiswa zacekelwa phansi, kwacekelwa phansi amagumbi okufundela namahhovisi esiFundeni uMgungundlovu.

Yize kuqubuke umlilo kodwa izivivinyo zikamatikuletsheni zizoqhubeka ehholo lesikole njengoba kusalungiswa nophenyo.

Kushiswe kwacekelwa phansi isikole samabanga aphakeme eMpolweni, esifundeni uMgungundlovu, kwacekelwa phansi amagumbi okufundela namahhovisi kusanda kuqala izivivinyo zikamatikuletsheni.

Lokhu kuhlasela kwenzeke kuleli sonto, kwashiswa izingxenye zesikole kwagqekezwa namahhovisi amaningana. Kucekeleke phansi ifenisha nezinto zokufunda.

Ihholo lesikole, lapho abafundi bakamatikuletsheni bebhalela khona izivivinyo zabo, alizange lithinteke livumela ukuhlolwa ukuthi kuqhubeke ngaphansi kweso elibukhali.

UNgqongqoshe wezeMfundo KwaZulu-Natal, uMnuz Sipho Hlomuka, uhambele indawo yesigameko wathi ukucekelwa phansi kwempahla kuhlukumeze kakhulu abafundi nothisha. Ubize lokhu kuhlasela njengesenzo samabomu esimelene nezemfundo.

Amaphoyisa nezikhulu zemfundo bayaphenya, kanti uMnyango wezeMfundo KwaZulu-Natal uqinisa ezokuphepha ezikoleni nokusebenzisana nezithangami zamaphoyisa zendawo ukunqanda izigameko ezifuze lezi.

Kunxuswe amalungu omphakathi ukuthi alekelele ekuhlonzeni labo abadale umlilo futhi avikele izikole kule ndawo ekutheni zingaphinde zibe nomonakalo.

Umnyango uthe ukulungiswa kuzoqala uma amathimba ochwepheshe ephothule umsebenzi wawo. Izinyathelo zesikhashana ziyabekwa ukuze kuqinisekiswe ukuthi ukufunda kungaqhubeka ngokuphepha uma izivivinyo seziphelile.

Esithombeni esingenhla: Ukuqubuka komlilo esikoleni saseMpolweni Secondary esifundeni uMgungundlovu.

Umthombo wesithombe: UMnyango wezeMfundo KwaZulu-Natal