Indlunkulu yaBakholokoe eFree State ayimethembi uMengameli Cyril Ramaphosa ukuthi uzosigcina isethembiso sokukhuphula imiholo nemihlomulo yamakhosi njengoba kusenzima nokuthi kuhlonzwe iSilo sabo ngokusemthethweni.

ABakholokoe bakhala ngokuthi sekuphele iminyaka belinde uHulumeni kaRamaphosa ukuba anikeze iSilo sabo uKgosi Letsitsa Moloi III njengeNgonyama esemthethweni ngaphansi kwezigaba zobuHoli boMdabu naBathwa.

Umsizi kaKgosi Letsatsie III, uMnuz Zenzwezinhle Mdletshe uthe njengoba uMengameli esekhuluma indaba yokuba uHulumeni wakhe ufuna amakhosi athole imihlomulo efanayo beyamalunga ePhalamende kodwa usahlulwa ukunikeza UKgosi Letsitsa isitifiketi.

“UKgosi Letsitsa III sekunesikhathi eyilwa le ndaba yokuba ahlonzwe njengeNgonyama esemthethweni kodwa kuze kube manje akulungi. Lolu daba luqale ukusetshenzwa ngesikhathi sikaMengameli Jacob Zuma nokuthe uma sekuqala kulunga,kwangena uRamaphosa. Ngemumva kwalokho kuvele kwamakonke kanti sisola ukugxambukela kwepolitiki okudale yonkelenkinga,” kusho uMdletshe.

Eqhuba uMdletshe uthe i-agenda yalezi zizathu asezibekile, kunzima ukwethemba uRamaphosa akushoyo ngenxa yokuthi osopolitiki benza izinto ngendlela yabo.

URamaphosa kuthe ngenyanga eyedlule wavakashela IKumkani Dalimvula Matanzima esigodlweni esiseQamata.

Kulo mhlangano uRamaphosa wathembisa ukuthi uHulumeni wakhe wenza okusemandleni ukuba aphucule izimpilo zabaholi bendabuko ngokuthi bathole imihlomule efana nabaholi bakahulumeni.

Kuzokhumbuleka ukuthi iKgosi Letsitsa III ibesematheni ngokulwa noHulumeni waseLesotho ofuna umhlaba waseFree State.

IKgosi Letsitsa III ithi iLesotho ayikwazi ukufuna umhlaba eFree State ngoba ngisho uMoshoeshoe akakaze ahlale kulesiya siFundazwe futhi akaze abenomhlaba khona.