• Abashushisi bahoxise wonke amacala abebhekene nosomabhizinisi u-Etienne van der Walt ngemuva kokuba ithimba lakhe lezomthetho lenze izethulo eziphumelelayo,nokube yisiphetho sezinsuku zakhe eziyishumi evalelwe ejele.

•Owayeyisikhulu soMnyango wamaPhoyisa kaMasipala waseKurhuleni (EMPD), u-Adrian Norman Mackenzie, kanye nowayeyiphoyosa uKeisha Leigh Stols, bobabili banikezwe ibheyili engu-R5,000 ngenkathi uphenyo luqhubeka.

Icala lokwebiwa kwamatshe ayigugu abiza u-R14.9 million lithathe isimo esisha ngoLwesine ngesikhathi abashushisi behoxisa wonke amacala abebhekene nosomabhizinisi u-Etienne van der Walt.

U-Van der Walt uphume eNkantolo yamaMantshi yaseGoli engumuntu okhululekile ngemuva kokuchitha izinsuku eziyishumi evalelwe.

Kulelo cala elifanayo owayeyisikhulu soMnyango wamaPhoyisa kaMasipala waseKurhuleni (EMPD), u-Adrian Norman Mackenzie, kanye nowayeyiphoyisa uKeisha Leigh Stols, bobabili banikezwe ibheyili engu-R5,000.

Laba bobabili basabhekene namacala ahlobene nalolu daba lokwebiwa kwempahla ebiza izigidi zamarandi.

Icala lihlehliselwe umhlaka-28 kuNcwaba ka-2026 ngenkathi abaphenyi beqhubeka nokuqoqa ubufakazi.

Icala ligxile kulokho abashushisi abathi kwakuyimisebenzi yamaphoyisa engekho emthethweni endaweni yezitolo eKillarney, eGoli, ngoNcwaba ka-2023.

Ngokusho kweNational Prosecuting Authority, abasolwa kuthiwa bazenza amaphoyisa, bafaka owayenezikhalazo ozankosi base beba amabhokisi ayisithupha amatshe ayigugu abiza cishe u-R14.9 million.

Uphenyo luyingxenye yophenyo olukhulu, kanti abashushisi bathi kungase kube nokunye ukuboshwa kwabantu.

Ukukhululwa kuka-Van der Walt kuze ngemuva kokuba ithimba lakhe lezomthetho lenze izethulo eziphumelelayo kuMqondisi Wezokushushiswa Komphakathi (Director of Public Prosecutions).

Ummeli wakhe, uPeter Jay, uthe ikhasimende lakhe lizizwa likhululekile ngokuhoxiswa kwamacala.

“Ikhasimende lami lijabule kakhulu. Manje selingaqhubeka nempilo yalo kanye nebhizinisi lalo, elihlupheke kakhulu kusukela ngesikhathi liboshwa,” kusho uJay.

Ngaphandle kwenkantolo, uVan der Walt ubingelelwe ngumama wakhe, uSanete du Toit, kanye nomkakhe okhulelwe, ojabulile ngemuva kokuzwa lesi sinqumo.

UDu Toit ubonge uNkulunkulu ngokukhululwa kwendodana yakhe.

“Sikholelwa ukuthi uNkulunkulu ukwenze kwenzeka.” “Ubulungiswa buphumelele,” kusho yena.

Uthe umndeni awukaze uyeke ukukholelwa ekutheni akanacala phakathi nezinsuku eziyishumi ezinzima azichithe ejele.

Lapho ebuzwa ukuthi uVan der Walt uzowumangalela yini uMbuso yini ngokuboshwa kwakhe, uJay uthe leso sinqumo sizokwenziwa kuphela ngemuva kokubonisana nekhasimende lakhe.

Esitatimendeni ngemuva kwenqubo yenkantolo, isikhulu sezokuxhumana se-National Prosecuting Authority uMagaboke Mohlatlole siqinisekisile ukuthi amacala abhekene noVan der Walt ahoxisiwe ngemuva kokuba uMqondisi Wezokushushiswa Komphakathi amukele izethulo zomthetho ezenziwe egameni lakhe.

UMohlatlole uthe icala elibhekene noMackenzie noStols lizoqhubeka.

Uthe laba bobabili basolwa ngokubamba iqhaza ekuphangeni futhi bazovela enkantolo uma uphenyo seluphelile.

I-National Prosecuting Authority iphinde yaqinisekisa ukuthi abaphenyi basasebenza ukuthola nokubopha abanye abasolwa okukholakala ukuthi bahilelekile ekuphangeni.

Leli cala lidonsele ukunaka kwezwe lonke ngemuva kokuthi ubufakazi obulethwe phambi kweKhomishini kaMadlanga buxhumanisa iPhini lenhloko yoMnyango Wamaphoyisa aseKurhuleni Metro uJulius Mkhwanazi omisiwe nokuhlelwa kokuphanga.

UMkhwanazi akakabekwa icala kuleli cala futhi noma yiziphi izinsolo ezimfakayo azikakahlolwa enkantolo.

“I-National Prosecuting Authority isazimisele ukushushisa amacala obudlova nokuqinisekisa ukuthi labo abanecala bayalandisa ngohlelo lobulungiswa bobugebengu,” kusho uMohlatlole.

Esithombeni esingenhla: Usomabhizinisi u-Etienne van der Walt ukhululiwe ngemuva kokuba abashushisi behoxise wonke amacala, kwathi ababili ababeyizikhulu zoMnyango Wamaphoyisa aseKurhuleni Metro banikezwa ibheyili ecaleni lokuntshontsha amatshe ayigugu angu-R14.9 million.

Umthombo wesithombe: Ifayela