ENanda: OwayeyiNduna Enkulu yoMbuso kaZulu ubuyela ebandleni likaShembe, kodwa kulokhu eya eShembe Nazareth Baptist Church eNanda, enyakatho neTheku,njengeLungu loMkhandlu kuMnyango Wezokubusa Ngokubambisana Nezendaba Zomdabu KwaZulu-Natal.

Ihhovisi likaMfundisi Thulasizwe Buthelezi limemezele ngoLwesithathu ukuthi uzohola imizamo yokuletha usizo eThempelini laseBuhleni ngoLwesihlanu, kulandela isigameko sangoMsombuluko lapho kudilike khona udonga kwase kulimala abantu abayisishiyagalombili.
UButhelezi uvakashele ibandla ngeSonto njengoNdunankulu ukuze axolise ngamazwi ashiwo yiSilo uMisuzulu kaZwelithini ebhekise kwiNkosi uMduduzi Nyazilwezulu Shembe.
NgoLwesibili ususwe esikhundleni kwase kufakwa iNkosi uPhathisizwe Chiliza esikhundleni sakhe.
Kulindeleke ukuthi uButhelezi aphelezelwe yizikhulu eziphezulu ezivela eSikhungweni Sokuphathwa Kwezinhlekelele sesifundazwe, ukuze bahlole indawo lapho kudilike khona udonga futhi bathole imininingwane ephelele mayelana nophenyo.

EPietermaritzburg: Oyilungu lomkhandlu kwezokuthutha nezindawo zokuhlala, uSiboniso Duma, uncoma ithimba elibhekelela izindawo zokuhlala ngokusheshisa ukuthuthelwa kwezindawo ezintsha kwabathintekile ezikhukhuleni. Ngesikhathi ethula inkulumo yesabelomali ePhalamende lesiFundazwe saKwaZulu-Natal ngoLwesine, uDuma uveze ukuthi uhlelo lokwakhiwa kwezindlu luyaqhubeka nokunwetshwa kuso sonke isifundazwe, lapho sekwakhiwe khona amathuba angu-14 277.

Uphinde wamemezela ukuthi sekwakhiwe izindlu ezicishe zibe ngu-8 819 ezixhaswe ngokuphelele nguhulumeni, kanti kukhona nezindlu ezingaphezu kuka-800 ezakhelwe amalungu omphakathi asengcupheni; uthe okungenani izindlu ezingu-6 000 zakhelwe imiphakathi yezindawo zasemakhaya.

EThekwini: Inkantolo eNkulu yaKwaZulu-Natal (eThekwini) igwebe uPhakamani Mpanza (36) udilikajele ngokubulala uSuperintendent Errol Ogle (52). Umuntu abebekwe naye icala, uMzomuhle Gamede (45), ugwetshwe iminyaka engu-18 ngokubamba inkunzi nokuthumba. Ngomhla zingama-20 kuNtulikazi ka-2023, uSuperintendent Ogle wadutshulwa wabulawa nguMpanza kanye nababambisene naye emgwaqeni u-M7 eduze nendawo yokuphuma eya eMalvern, ngesikhathi ezama ukumisa iloli elalishayela ohlangothini olungalungile lomgwaqo. Abasolwa bamphuca isibhamu sakhe somsebenzi base behamba ngemoto yakhe yohlobo lwe-VW Polo ye-Durban Metro, eyatholakala kamuva ishiywe ePinetown. Uphenyo lokuqala lwembula ukuthi iloli lalithunjwe ngabasolwa futhi umshayeli wayevalelwe ngaphakathi. Ngesikhathi kwenzeka isigameko sokudubula, umshayeli wakwazi ukubaleka engalimalanga.
Kwavulwa icala lokubulala kanye nelokuthunjwa kwemoto esiteshini samaphoyisa sasePinetown, kanti ifayela laleli cala lanikezelwa kumalungu e-Hawks ayingxenye yophiko olubhekene nobugebengu obuhleliwe obunzima eThekwini (Durban Serious Organised Crime Investigation).

Esithombeni esingenhla: OwayenguNdunankulu uThulasizwe Buthelezi uzovakashela ibandla iShembe Nazareth Baptist Church ngemuva kokuwa kodonga ngoMsombuluko.

Umthombo wesithombe: KZNCogta