Umsolwa unyamalale no-R3,000 wemali ebolekiwe, ukudla kanye nesibonelelo sikagogo ngemuva kokuzenza sengathi umsiza ekumphathiseni izikhwama.

Amaphoyisa athungatha umsolwa futhi akholelwa ukuthi kungenzeka usazoqola nezinye izisulu ngendlela efanayo.

Uphatheke kabi ugogo uLerato Zulu (94), wase-Lowley eningizimu yeGoli ngemuva kokugetshengwa ngomunye obehola impesheni ezenza umuntu onomusa.

Ubesanda kuthola imali yakhe yempesheni e-Lenasia waphinde waboleka u-R3,000 ukuze athenge impahla yokwakha emjondolo wakhe ngesikhathi eqolwa konke.

Ngesikhathi ethenga, owesifazane osekhulile uze kuye futhi waqala inkulumo encane. UZulu uthe lo wesifazane ubebonakala enobungani waze wacela ukumphathela izikhwama zakhe ukuze afike erenki yamatekisi.

“Uthe naye uhlala e-Lowley uzohamba nami, ngacabanga ukuthi ungumuntu othembekile ,” kusho uZulu.

UZulu obesebenzisa induku, uthe izikhwama bezisindwa futhi ubebonga usizo alutholile.

Ngesikhathi ethenga isitofu, lona wesifazane umxwayise ngokuthi isibambo sesikhwama sakhe siphukile futhi wathembisa ukusigcina siphephile esikhwameni sakhe.

UZulu uvumile lo wesifazane wamtshela ukuthi udinga ukulanda imithi yakhe ekhemisi eseduze.

Akabange esabuya, yilapho ngibone khona ukuthi ngigetshengiwe,” kusho uZulu.

Lo wesifazane unyamalale nokudla, imali yesibonelelo sikahulumeni kanye no-R3 000 abezowusebenzisa ukulungisa umjondolo wakhe ovuzayo.

“Inhliziyo yami ibuhlungu, bengimethemba, kumele atholakale aboshwe, ugebenga abampofu impesheni.

Okhulumela amaphoyisa ase-Gauteng uLieutenant-Colonel Mavela Masondo uliqinisekisile icala.

Uthe amaphoyisa athungatha umsolwa osekhulile futhi akholwa ukuthi kungenzeka asebenzise iqhinga elifanayo nakwabanye.

“Sinxusa noma ngubani ongaba nolwazi noma obanjwe inkunzi ngendlela efanayo ukuba abikele esiteshini samaphoyisa e-Lenasia,” usho kanje.

Esithombeni esingenhla: UGogo Lerato Zulu unxusa amaphoyisa ukuba abambe owesifazane ontshontshe impesheni kugogo.

Umthombo wesithombe: UDoreen Mokgolo