Isakhamuzi sase-Vosloorus sithi sibone owesilisa emisa imoto yakhe ebomvu, waphuma nesibhamu wadubula ngesikhathi yena nomlingani wakhe bebaleka bengagqokanga izicathulo.

Amaphoyisa athi usomabhizinisi uBrown Mogotsi omataniswa neKhomishini kaMadlanga akakalivuli icala ngemuva kokuba imoto yakhe ishaywe yizinhlamvu eziningi.

Ukuzola kwasebusuku e-Vosloorus kunqamuke ngesikhathi kuqhuma isibhamu ngaphambi nje kuka-9 ebusuku ngoMsombuluko, kwaphoqa izakhamuzi ukuba ziyocasha.

Owesifazane ohlala e-Extension 25 uthe ubesekhaya nathandana naye ngesikhathi imoto ebomvu igijima emgwaqeni yama kungazelelwe ngaphandle komuzi wakhe.

“Bengisekhaya ngesikhathi kudlula imoto ebomvu ngesivinini esikhulu maqede yama, umshayeli waphuma ephethe isibhamu ngesandla waqala ukudubula, mina nalowo engithandana naye sagijima ngezindlela ezihlukene siyocasha, ngisho izicathulo zami ngizishiye ngemuva,” kusho yena.

Owesifazane uthe ushayasibhamu ubelokhu edubula ngesikhathi ecasha ngemuva kodonga.

Emuva kwemizuzu omakhelwane bahlangana endaweni yesigameko bathola imoto ebomvu igcwele izimbobo zezinhlamvu. Womabili amafasitela angaphambili abephahlazekile, amathoshi ekhanga, nemoto ibisaduma.

Kuthe izakhamuzi zisazama ukuqonda ukuthi kwenzekeni, kuqhamuke imoto emhlophe yohlobo lwe-VW Golf yama ngemuva kwemoto ebomvu. Bamangala lapho usomabhizinisi uBrown Mogotsi ephuma ngaphandle.

UMogotsi utshele iphephandaba iSowetan ukuthi ubelandelwa ngamadoda angaziwa abehamba ngeveni elimhlophe esuka egaraji lase-Spruitview BP kanti ubesendleleni ebheke e-Victoria Hotel ngesikhathi kuqala ukudubula.

UMogotsi ungusomabhizinisi oxhumene nezepolitiki futhi ungumuntu obalulekile kwiKhomishini kaMadlanga ephenya ngobugebengu nokugxambukela kwezombusazwe ohlelweni lwezobulungiswa.

Abaqaphi bomphakathi bafike ngokuhamba kwesikhathi kodwa abatholanga zimpawu zabahlaseli. Izakhamuzi zithi amaphoyisa aze afika endaweni yesigameko ngemuva kwehora nesigamu.

Okhulumela amaphoyisa kuzwelonke, uBrigadier Athlenda Mathe, uthe amaphoyisa akhulume noMogotsi owawatshela ukuthi uthuthumele kakhulu ukuthi angabhala isitatimende kanti uzovula icala ngakusasa ekuseni. Kodwa ngo-5 ntambama ngoLwesibili, ubengakayi esiteshini samaphoyisa e-Vosloorus.

UMathe uthe amaphoyisa aphenya icala lokuzama ukubulala ngemuva kokuthi imoto kaMogotsi ishaywe yizinhlamvu ezilinganiselwa kweziyishumi nanye.

Lokhu kuhlasela kuza njengoba igama likaMogotsi lisaqhubeka nokuba sematheni kukhomishini.

Abanye emphakathini banovalo lokuthi lesi sigameko sokudubula sihlobene nepolitiki. Abanye bayahleba bethi kungenzeka uzenzele yena lokhu.

Amaphoyisa athi aphenya yonke indawo okuhlanganisa nokuthi ukuqhuma kwesibhamu kwasebusuku bekuwumzamo wangempela wokubulala noma enye into.

Esithombeni esingenhla: Imoto kaBrown Mogotsi

Umthombo wesithombe: SAPS