USandiswa Bakuba usalinde indlu ayithenjiswa uFikile Mbalula nekhansela lewadi ngesikhathi kugujwa usuku lokuzalwa lwe-ANC ngoMasingana eKhayelitsha.

Ikhansela lewadi uLonwabo Mqina uthi uthole imvume yeDolobha laseKapa kuphela ngesonto eledlule, kanti selukuMnyango wezokuHlaliswa kwaBantu.

Owesifazane oneminyaka engu-35 okhubazekile waseKhayelitsha usalinde uMnuz Fikile Mbalula nekhansela lewadi yakhe ukuthi bagcine isethembiso sabo sokumakhela umuzi.

USandiswa Bakuba, osebenzisa izinduku ngemuva kokunqunywa umlenze wesobunxele ngo-2010, uthe lesi sithembiso basenza ngesikhathi i-ANC igubha iminyaka engu-113 yasungulwa ngoMasingana.

Ikhansela lafika emjondolo wakhe oseNew Culture lihamba noMbalula namanye amalungu e-ANC lamthembisa umuzi.

“Ngaze ngajabula ukubabona, bangithembisa ukuthi umuzi owawuzokwakhiwa ngenyanga elandelayo okwakunguNhlolanja kodwa kuze kube manje abakangihlaziyeli lutho,” kusho uBakuba.

Ubelokhu ezama ukuthola izimpendulo ekhanseleni lewadi.

“Angikwazi ukumthola uMbalula, ngakho benginethemba lokuthi ikhansela lami lizosiza kwazise yilona elifike noMbalula futhi liyazi ukuthi ngingamthola kanjani,” kusho uBakuba.

Ngesikhathi kwenziwa isethembiso ngajabula ngoba ngangingeke ngisazikhathaza ngezimvula ezinamandla noma imililo evamile emijondolo.”

Uzwa sengathi badlale ngaye.

“Kumanje usuyophela unyaka abatholakali, bengingeke ngibe nankinga ukube bebengiphendula kodwa manje sebethule bonke,” kusho uBakuba.

“Engikufunayo ukuthi bagcine isethembiso, kumele bangakhele umuzi abathembise wona.”

Ikhansela lewadi uLonwabo Mqina uthe uthole imvume yokuhlala eDolobheni laseKapa ngesonto eledlule.

“Ngiyakuzwa ukudinwa kwakhe kodwa akalikhulumi iqiniso uma ethi bengingamtsheli lutho futhi akukho esingakwenza ngaphandle kokuthola imvume,” kusho uMqina.

“Njengoba sesinayo imvume yokuhlala, yonke into isiseMnyangweni wezokuHlaliswa kwaBantu. Le ntokazi izothola ulwazi olusha maduze nje.”

UBakuba uhlala ngokwesaba ngenxa yezimvula ezinamandla kanye nemililo evamile emijondolo.

Esithombeni ngenhla: Ngesikhathi i-ANC igubha iminyaka engu-113 yasungulwa eKapa, ​​uFikile Mbalula kanye nekhansela lewadi bathembisa intokazi indlu..

Esithombeni esingenhla: Sithunyelwe nguSandiswa Bakuba