Kushabalale amathemba okuba uNgqongqoshe kuMengameli we-NFP evinjwa ukuyofungiswa ngomzuzu wokugcina

22nd October 2026

Musa Zondi of the IFP. Under the plan, the traditional prime minister to the Zulu monarch, Inkosi Phathisizwe Chiliza, was set to be voted in as premier of an MK-led government.

Usale nomswenko uMengameli we-NFP kubhuntsha ngomzuzu wokugcina ukufungiswa kwakhe njengelunga elisha lesiShayamthetho saKwaZulu-Natal ngemumva kokuba uSomlomo egunyaze ukuba uNksz Mbali Shinga aqhubeke kuze kuba uphothula imigudu yasenkantolo.

Lokhu kulandela incwadi ethunyelwe ngolwesithathu ntambama uSomlomo uNksz Nontembeko Boyce kuNobhala Jikelele we-NFP, uMnuz Sunset Xaba imazisa ukuthi useyakuhoxisa ukufungiswa kukaMnuz Ivan Barnes njengelunga elisha lesishayamthetho.

Kuthiwa kwenzeke lokhu nje uBarnes ubesekulonde ngabomvu ukuyofungiswa eselungise nesudi engumacekeceke njengoba bekumele afungiswe ngoLwesine ekuseni ezindlini zesiShayamthetho eMgungundlovu.

"Ngemumva kwesinqumo senkantolo yejaji uMngadi, kukhona izigaba azibekile ezigunyaza ukuba njengesiShayamthetho simvumele uMbali Shinga ukuba aqhubeke nokuba sesishayamthetho ngesikhathi esadlulise isinqumo senkantolo.

Lokhu kusho ukuthi ukufungiswa kwelunga elisha le-NFP njengokuxhumana esibenakho ngoMsombuluko sengiyakuhoxisa. UMbali Shinga yena usazoqhubeka nokuba ilunga lesiShayamthetho kuze kube kudlula imigudu yakhe yasenkantolo ngalolu daba," kusho uNksz Boyce.

Lesi sinqumo somzuzu wokugcina sicasule ngisho abaholi beqembu uMkhonto weSizwe Party abesebekulungele ukuthatha uHulumeni ngokubambisana ne-EFF neNFP ngaphansi kukaBarnes.

Kuthiwa izingxoxo besezisezingeni eliphezulu zokuthi iMKP iyawathatha amandla okuphatha uHulumeni waseKZN osaphethwe ngokubambisana I-IFP, I-ANC, I-DA ne-NFP ngaphansi kukaNksz Shinga.

UBarnes kuthiwa ubesevele ekubeke kwacaca ukuthi yena ufuna ukuba uNgqongqoshe wezokuThuthukiswa koMnotho nokoNgiwa kweMvelo KwaZulu-Natal kanti iMKP yona ibihlele ukuba uNdunankulu kaZulu, iNkosi uPhathisizwe Chiliza ibenguNdunankulu waseKZN okuyisikhundla esiphethwe uMnuz Thami Ntuli.