Unogada waseKhayelitsha osebenzisa ingxenye eyodwa kwezintathu (1/3) yomholo wakhe kwezokuthutha uthi kuzomele ayeke ukusebenza uma amanani amatekisi enyuka.

UNolonwabo Mdambatya uchitha u-R2,040 njalo ngenyanga ematekisini ukuze aye emsebenzini wakhe wobunogada eCentury City esuka eKhayelitsha.

Abaphathi bamatekisi bendawo bathi ngeke bawenyuse amanani okugibela okwamanje yize kube nokwenyuka okukhulu kwentengo kaphethiloli muva nje.

UNolonwabo Mdambatya ukhokha u-R102 nsuku zonke ukuze aye emsebenzini futhi abuye. Lo nogada oneminyaka engu-40 ubudala uhamba evela eKhayelitsha eya eCentury City eKapa.

Uhola u-R6,000 ngenyanga. Kodwa ingxenye enkulu yemali yakhe iya ngqo ematekisini endawo.

UMdambatya ukhokha u-R17 ukuze ahambe esuka ekhaya aya esiteshini samatekisi.

Bese ekhokha u-R34 owengeziwe ukuze afike eCentury City. Lokhu kumbiza imali engu-R2,040 njalo ngenyanga.

Ukwenyuka kwentengo kaphethiloli muva nje kwenze waba nokwesaba ukuthi abaphathi bamatekisi bazowenyusa amanani. Uthi uzoyeka ukusebenza uma amanani okugibela enyuka.

"Ngeke ngibe nokuzikhethela ngaphandle kokuyeka umsebenzi ngoba ngizobe ngisebenzela ukukhokhela ezokuthutha kuphela," kusho uMdambatya.

Ngemuva kokukhokhela amatekisi, usala no-R3,960 kuphela wokuthenga ukudla nokukhokhela umshwalense womngcwabo. Izindleko eziphakeme zokuphila zisho ukuthi akasakwazi ukuthenga konke okudingwa umndeni wakhe.

"Sengivele nginciphise izinto eziningi ebesizidla, njengenyama ebomvu, amaqanda, nobisi oluyimpuphu," kusho uMdambatya.

Uthe uyeke ukuthengela izingane zakhe i-KFC ukuze akwazi ukuthenga izidingo eziyisisekelo zasekhaya.

Wazama ukuqasha igumbi eduze nomsebenzi wakhe ngo-R600 ngenyanga ukuze anciphise izindleko zokuhamba. Kodwa lelocebo aliphumelelanga ngoba kwakusadingeka athengele umndeni wakhe ekhaya ukudla.

Izinhlangano zamatekisi bendawo zingenelele ngezindaba ezinhle kubagibeli abahluphekayo. Usihlalo we-Codeta uNceba Enge uthe inhlangano ngeke iwenyuse amanani okugibela okwamanje. Isikhulumeli se-Santaco, uMakhosandile Tumana, sithe igatsha laseWestern Cape lisalindile.

Inyunyana yabasebenzi i-Cosatu ithi abasebenzi babhekene nenkinga yokwenyuka kwezindleko zokuphila. Le nyunyana ithi ukwenyuka kwakamuva kwentengo kaphethiloli—okulinganiselwa ku-R3 ilitha kuzokwenza ukudla kubize kakhulu emindenini.