Isikhulu se-Pirates, u-Irvin Khoza, ukuqinisekisile ukuthi uRiveiro ucele ukusheshe ahambe ngemuva kokusayina nelinye iqembu, base bevuma ukumdedela.

Lo mqeqeshi wase-Spain kulindeleke ukuthi ajoyine izinkunzi zase-Egypt, i-Al Ahly, ezifuna umqeqeshi omusha ngemuva kokudedelwa kukaMarcel Koller.

URiveiro uphumile eNingizimu Afrika, futhi uphokophele ekutholeni iholo elikhulu kunawo wonke lokuqeqesha elake labonwa izwekazi.

I-Pirates ikuqinisekisile ngoMsombuluko ukuthi isheshe yamkhulula ngemuva kokuthi ecele ukuhamba ingakapheli inkontileka yakhe.

Usihlalo u-Irvin Khoza uthe: “UJose ufike kithina emasontweni ambalwa edlule efuna ukudedelwa enkontilekeni yakhe ngaphambi kwesikhathi esibekiwe, njengoba esesayine neqembu elisha.”

Imibiko ithi lo mqeqeshi wase-Spain usezothatha izintambo ku-Al Ahly yase-Egypt. Uma isivumelwano siphothulwa, uzoba umqeqeshi okhokhelwa kakhulu emlandweni webhola lase-Afrika.

I-Al Ahly ibingenamuntu selokhu ihlukane nomqeqeshi wase-Switzerland uMarcel Koller ngenyanga edlule.

Umdlalo kaRiveiro wesibili kowokugcina ube buhlungu ngesikhathi i-Pirates ihlulwe ngo 2-1 i-Kaizer Chiefs kowamanqamu we-Nedbank Cup, kwaqeda iphupho layo lokuwina isicoco sesithathu kulandelana.

Nangemuva kokuhlulwa abalandeli abaningi bebesameseka. Ubevele ememezele ezinyangeni ezimbili ezedlule ukuthi uzohamba ekupheleni kwesizini, kodwa abalandeli bebengakakulungeli ukuvalelisa.

Eminyakeni emithathu nje vo, usize i-Pirates yanqoba izicoco ezintathu ze-MTN8 nezimbili ze-Nedbank Cup. Usondele kuPremiership, kodwa wangakwazi ukuqhwakela phezulu.

Manje i-Pirates izoqeda isizini ngaphandle kwakhe. IMamelodi Sundowns ingase igcine isicoco kule mpelasonto uma ingahlula i-Chippa United.

Khonamanjalo, uRulani Mokwena owayengumqeqeshi we-Wydad Casablanca ngiyena ongase angene esikhaleni sakhe. Unomlando omude naleli qembu, uyise uJulius Sono nomalume uJomo Sono bobabili bayizingwazi kuleli qembu.

Esithombeni esingenhla: UJose Riveiro.

Umthombo wesithombe: Ifayela