INingizimu Afrika ibimelwe yilo mdlali oneminyaka engu-18 ubudala eqenjini labangaphansi kweminyaka engu-17 nengu-20 ngaphambi kokuthi adlale okokuqala kuBanyana ku-Cosafa Womens Championship ngo-2022.

UMogale ubelokhu ezibonakalisa ngokufaneleka ukudlala eqenjini lesizwe labadala.

“Bekungelula ekuqaleni ngoba bengingazethembi. Iqembu lesizwe labadala lihluke kakhulu njengoba kunabadlali abadlala esigabeni esiphezulu phesheya kwezilwandle,” kusho uMogale etshela i-Scrolla.Africa.

“Izinga kumele libe phezulu kimina nakubo, kodwa okwangisiza ukuthi ngithuthuke futhi ngibizelwe kwamanye amakhempu esizwe aphezulu wukukholelwa kulokho engingakwenza.”

Njengomlandeli omkhulu kakaputeni weBanyana, uRefiloe Jane, uMogale ubezama ukubhekana nengcindezi yokuba ngumdlali omusha eqenjini lesizwe.

“Kuyohlale kunengcindezi, kodwa kuze kube manje kukhona ukuthuthuka kuwo wonke amakhempu,” kusho yena.

“Umdlali ongigqugquzela kakhulu nguRefiloe Jane, kodwa bonke nabanye bayangigqugquzela. Umoya wabo wokulwa awuchazeki futhi bamukelana ngendlela enhle kakhulu.”

Wabelane ngezifiso zakhe zokusiza iBanyana ukuthi ingenele imiqhudelwano emikhulu, okuhlanganisa neNdebe Yomhlaba ye-Fifa yabesifazane nama-Olympic.

Uthe umqeqeshi uDesiree Ellis uletha abadlali abasebancane eqenjini lesizwe labadala, okuyinto esiza ekwakheni nasekuqhubekiseni umlando weBanyana Banyana.

“Besingangena kulama-Olympics akhona. Umqeqeshi wethu uzobuyela emuva alungise lapho esingenzanga khona kahle ukuze isizukulwane esizayo siguqule izinto ngokuthi siphumelele sikwazi nokungenela imincintiswano,” usho njalo.

UMogale ugxile ekuzibophezeleni eqenjini lakhe i-JVW nokuhlala ezinhlelweni zika-Ellis.

Esithombeni ngenhla: Umdlali wasesiswini weBanyana Banyana uMmabatho Mogale.

Umthombo: Tuks Sports